Претходно
Филм: Фокус (Focus)
Некои нешта во животот вредат многу повеќе отколку што сте можеле да забележите претходно
Режија: Глен Фикара, Џон Рикуа
Улоги: Вил Смит, Маргот Роби, Родриго Санторо
Времетраење: 105 минути
Јазик: англиски
Премиера: 27 февруари 2015
Жанр: комедија, криминал, драма
Наша оценка: 8/10
Ваша оценка: 
(12 гласа, просек: 9,67 од 10)
Loading...
Ники (Вил Смит) е многу познат и успешен измамник. Тој е толку вешт во својата професија што не постои ништо што може да му избега од неговиот видик. Барем на прв поглед така изгледа. Но, работите брзо ќе се променат откако тој ќе ја запознае Џес (Маргот Роби) која сосема ненадејно ќе успее да му покаже дека има многу повеќе во животот одошто тој некогаш успеал да види и доживее.
Џес е млада девојка која се обидува да се пробие во кругот на измамниците. Но, нејзините почетнички грешки ќе ја одведат директно во рацете на Ники кој поради љубопитност ќе ѝ дозволи да се обиде да го измами. Секако, нејзиниот обид ќе резултира со неуспех, но тоа нема да ја спречи повторно да го пронајде со цел да се обиде да го натера да биде нејзин ментор. Но, бидејќи Ники не е заинтересиран за оваа улога, токму во тој момент ќе почнат игри на измами кои ќе траат со години.
Станува збор за филм кој мора да го следите будно со цел да ги забележите сите детали од приказната. Бидејќи главните ликови се измамници, повеќето од времето тешко е да се направи разлика помеѓу вистината и лагата во она што го кажуваат. Токму затоа и филмот има голем број пресврти. Вие само што сте помислиле дека ја следите приказната, одеднаш ќе сфатите дека еден од нив лажел и токму тоа ќе ве одведе во сосема друга насока. Но, ова е и една од причините зошто би требало да му дадете шанса на овој филм.
