Месечината низ хороскопските знаци

Автор: Тања Илиевска

Знакот во кој се наоѓа месечината при нашето раѓање открива многу за нашите навики, реакции и инстинкти. Тој покажува како ги искажуваме и како се справуваме со нашите емоции и ги открива нашите најдлабоки потреби. Овој знак можеме да го прочитаме од нашата натална карта или за таа цел да се послужиме со онлајн калкулатор. Она што следува не е детално толкување, туку општи карактеристики на месечината во хороскопските знаци.

Месечина во овен

Месечината во овен во наталната карта укажува на брзоплето и избрзано донесување одлуки и на инстинктивни реакции. Покрај тоа оваа личност може често да го менува расположението и да биде нетрпелива. Кога месечината е во хармонична позиција, тогаш личноста јасно ги изразува своите желби и потреби, независна е и многу активна, па поради овие способности успева да оствари забележливи резултати во работата и отворен и искрен однос во љубовта. Лошите положби на месечината во овој знак, укажуваат на неосновано упатување негативна критика, слабост и егоистично однесување.

Месечина во бик

Месечината во бик во наталната карта укажува на личност која во емотивна врска се впушта со одредена доза на внимание, па и сомнителност. Оваа личност може бавно да реагира и потешко да остварува подлабок т.е. отворен однос во љубовта, ама кога еднаш се заинтересира за некого станува многу пријатна и достојна за доверба. Во суштина ова е личност која бара стабилност и тежнее кон сигурност во љубовниот однос, но не ги изразува најдобро своите чувства. Во тешките аспекти на месечината, личноста може да биде многу тврдоглава, тешко се прилагодува и не e подготвена на компромис.

Месечина во близнаци

Месечината во близнаци во наталната карта укажува на способност за изразување чувствата на мудар и интелигентен начин. Оваа личност може да биде многу енергична и принципиелна и во емотивната врска се поставува рационално, смирено и умее добро да се прилагодува и да воспоставува контрола над ситуацијата. Кога месечината во оваа положба е лошо поставена, личноста може да биде со непостојана природа и да има променливи чувства со што остава лош впечаток кај другите. При добрите положби на месечината, личноста може да биде многу аналитична, комуникативна и мудра.

Месечина во рак

Месечината во рак во наталната карта често укажува на многу емотивна личност, која многу лесно може да заплаче штом ќе ја совладаат силни емоции. Настаните од минатото можат многу силно да влијаат врз неа во сегашноста и врз нејзините одлуки поврзани со идните настани. За неа е карактеристично силното влијание на мајката во детството, посебно во поглед на сфаќањето на моралните вредности. Поради застапеноста на поголема количина на емоции кои личноста ги внесува во сè што работи, постои опасност таа да не може доволно рационално да ги согледа нештата, особено кога месечината е лошо поставена.

Месечина во лав

Месечината во лав во наталната карта укажува на сензитивна, пријатна и пожртвувана личност, која е полна со живот. Со други зборови ова е личност со јаки и интензивни чувства, која зрачи со позитивна енергија и поседува необична харизма. Поради тоа, прилично е сакана во друштвото, а во љубовта може да биде вистински магнет. Присуството на хармонични аспекти на месечината често укажува на прилично среќна личност, која може да биде многу ефикасна, самоуверена и истрајна. Лошите позиции на месечината можат да укажат на претерана своеглавост, конфузија на чувствата, претерана гордост и чувство на поголема вредност и надмоќност.

Месечина во девица

Месечината во девица во наталната карта често укажува на личност која побргу би ги потиснала своите чувства, отколку да ги искаже. Оваа личност е срамежлива и ненаметлива и често поради тоа може да го одвлече вниманието од себе. Многу внимателно и вредно работи за да постигне добри резултати, а кога постигнува успех не сака претерано да се фали со тоа и громогласно да го искажува своето воодушевување. Таа работи со стил и скромност. Во случај на лоши позиции, личноста може да биде склона кон песимистично размислување и да има проблеми со самодовербата.

Месечина во вага

Месечината во вага во наталната карта често укажува на изразена потреба за љубов која на оваа личност ù е од суштинско значење во животот. Овие личности не се воздржуваат на отворен начин да ги изразат своите чувства. Емоционалните реакции се често добро усогласени со разумот, така што личноста во сите прилики најчесто остава впечаток на некој кој е урамнотежен и емоционално интелигентен. Кај поволните положби на месечината во вага, личноста достигнува несебична смиреност и спокојство, така што полесно успева да дојде до благосостојба и до некои наизглед недостижни цели, токму поради својата разбраност и мудрост. Кај лошите положби на месечината, изразена е опасноста од склоност кон меланхолично однесување, особено доколку постојат проблеми на полето на љубовта.

Месечина во скорпија

Месечината во скорпија во наталната карта укажува на тешко искажување на емоциите. Оваа личност е истовремено и многу страсна и многу ранлива, така што повеќе гледа да ги искажува емоциите на скриен и индиректен начин за да се заштити од евентуално емотивно разочарување. Тврдоглава е, поради што може многупати да работи на своја штета. Кога месечината во оваа положба е лошо аспектирана, оваа личност може потсвесно во љубовните врски да тежнее кон доминација што никако нема да ù се допадне на другата страна. Меѓутоа при присуството на хармонични аспекти, личноста кон работите приоѓа со голема количина на љубов и страст, а во љубовта повеќе е свртена кон остварување на долготрајна врска, отколку кон кратки авантури.

Месечина во стрелец

Месечината во стрелец во наталната карта често укажува на отворен, филозофски и многу позитивно настроен тип личност, независна и оригинална во размислувањето, која исто така го цени и мислењето на другите луѓе. Во љубовта ги изразува своите најдлабоки чувства на по малку резервиран начин. Кога месечината во оваа положба е добро насочена, тоа укажува на личност со изразена самодоверба и способност на сите неволји и проблеми во животот да приоѓа на еден многу рационален и храбар начин. Исто така во овој случај е присутен и огромен оптимизам со чија помош личноста успева да реши и наизглед нерешливи проблеми.

Месечина во јарец

Месечината во јарец во наталната карта укажува на личност која е резервирана и која не сака претерано со зборови да ги искажува своите чувства. Вредна и дисциплинирана, оваа личност има многу озбилен и зрел пристап кон животот, поради што често може да делува позрело во однос на своите врсници. Свесна е за своите квалитети и ограничувања. При присуство на лошите аспекти на месечината во јарец може да се јави песимистички поглед на животот, додека во случај на хармонични аспекти постојат нагласени можности личноста да биде голем авторитет или на добро платена функција на работа.

Месечина во водолија

Месечината во водолија во наталната карта неретко укажува на личност која ја привлекува сè што е невообичаено и несекојдневно. Таа себеси се доживува како доброчинител и како некој кој има потреба да застане на страната на послабите. Дури и како возрасна личност, настроена е кон бунт и сака да направи сè што е во нејзина моќ да ги смени работите т.е. во некоја смисла да ги подобри. Кога месечината е добро поставена, укажува на голема принципиелност и традиционално всадени вредности. Лошо поставената месечина укажува на тоа дека личноста на другите може да им делува ладно и недостапно, најчесто поради тешкото изразување на внатрешните чувства. Причината за ваквото однесување може да се најде во тоа што при присуството на лошите положби може да биде обесхрабрена и без доволно самодоверба.

Месечина во риби

Месечината во риба во наталната карта укажува на многу сензитивна личност, која често се раководи според своите чувства. Поради силното влијание на емоциите, оваа личност може да биде недоволно објективна. Врз нејзиното расположение влијае околината, така што врз неa можат да се пренесат негативните и позитивните чувства од другите луѓе.

Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.

💗 Денес ви споделуваме рец

💗 Денес ви споделуваме рец

💗 Погледнете ги овие невер

📢 Денес ви споделуваме рец

Следете нѐ на Инстаграм