Претходно
Познатите низ објективот на Марк Хом
Марк Хом е роден во Копенхаген, Данска во 1967 година. Откако ги завршува студиите по фотографија на Данската академија за уметност во 1989 година го продолжува својот живот во Њујорк. Првите 18 месеци ги поминува како фриленсер со веќе докажани фотографи од Њујорк, а после тоа добива задача да направи книга од фотографии за Виенскиот Балет. Хом ги поминува следните шест месеци во Виена, фотографирајќи ги главните балетани, балерини и режисери за на крајот да создаде книга со 80 фотографии. По завршената работа во Виена, се враќа во Њујорк и почнува да работи за Харперовиот Базар заедно со Лиз Тилберис и Фабиен Барон. Оваа работа претставува пресвртница во кариерата на Хом, затоа што навлегува во светот на модната фотографија што подоцна и ќе го издигне меѓу најдобрите фотографи од оваа област.
Работата на Марк Хом вклучува кампањи за модните куќи Гучи, Макс Мара и Гени, како и фотографии од најкреативните, најпознатите и највлијателните личности од нашето време. Дел од нив се: Иги Поп, Шер, Феј Доновеј, Кристофер Вокен, Александер Мекквин, Нино Черути, Вивиан Вествуд, Поли Мелен, Џони Деп, Анџелина Џоли, Гвинет Палтроу и уште многу други. Голем дел од неговите фотографии се имаат појавено во различни изданија од магазинот W, Harper’s Bazaar, Венити Фер, Британскиот Вог, Германскиот Вог, магазинот Talk, Њујоркер, Арена Њујорк Тајмс и уште многу други.
