Претходно
Малиот црн фустан низ историјата на модата
Датум: 13 дек 2012
Коментари: 0
Тагови: Диор, Одри Хепберн, Шанел, безвременост, гламур, дизајнери, елеганција, историја, мал, мода, фустан, црн
Малиот црн фустан е она парче облека кое секоја жена треба да го има во својот плакар – фустанот со кој нема да погрешите во ниту една ситуација. Од бизнис состаноци, вечерни излегувања па сè до формални и свечени настани, малиот црн фустан е добитна комбинација. Во светот на модата ова парче облека е симбол на стил, безвременост и елеганција. Низ годините, па сè до ден денес служи како инспирација на сите дизајнери и иако се развиваше и менуваше со модните трендови, сепак остана како една од најважните модни креации.
Пред 20-тите години
Во раните години на 19 век црната боја се сметала за симбол на жалење и искажување почит кон мртвите и ни оддалеку не се поврзувала со модата. Сè додека сликарот Џон Сингер Сарџент не ја насликал Мадам Х, портрет на млада дама во црн, елегантен фустан. Оваа слика предизвикала доста контроверзии поради, за тоа време, изразената сексуалност.
20-тите години
Првиот мал црн фустан бил креиран од страна на неверојатната Коко Шанел. Во 1926 година бил објавен цртеж на првичен модел на црн фустан од Коко Шанел во Вог и уште тогаш бил наречен „Форд во модата“ поради неговата едноставност и тенденцијата кон безвременост. Тоа дефинитивно бил само почетокот на оваа модна креација која истовремено станала симбол и на ослободувањето на жената. Малиот црн фустан освен елеганција и стил значел и конечно отфрлање на корсетот и секако заштедувал на време затоа што бил многу полесен за облекување.
30-тите години
Години на економска криза и сиромаштија, но истовремено и на модна експанзија, холивудски гламур и дефинитивно златното доба на театарот. Токму овој период го одбележа таканаречениот „флапер“ фустан којшто е всушност бунтовна и весела верзија на малиот црн фустан. Делувал разиграно и опуштено, а особено биле популарни оние со везени детали. Го поврзувале со џезот и со бунтовно однесување, па не е ни чудно што токму овој фустан станал симбол на 30-тите години.
40-тите години
За време на војната станал омилено парче облека поради неограничените можности за комбинирање, што автоматски значело помалку трошоци за облека. Во овие години рационализацијата била на прво место, па и жените го искористиле тој момент за да го популаризираат неговото носење. Малиот црн фустан одлично оди со разни модни додатоци што значело многу едноставен начин да се биде модерен.
50-тите години
Како што гламурот на Холивуд сè повеќе привлекувал, така и желбата за мода и малку елеганција во секојдневниот живот, особено после војната, сè повеќе растела. Малиот црн фустан доживеал одредени промени коишто всушност значеле малку повеќе луксуз и надеж за подобро утре. Диор преку својата „New Look“ колекција го прикажал новиот фустан, со поширок долен дел и многу посекси изглед. Практично, ова значело дека времето на „врзување крај со крај“ завршува и доаѓаат многу подобри години.
60-тите години
Во овој период се среќаваме со два различни стила на носење на малиот црн фустан. Првиот начин бил посоодветен и подобро прифатен од постарите генерации, со што фустанот ја задржал својата едноставност и должина. Но, младите жени во 60-тите години добиваат поинаква идеја за тоа што е модерно, и по долгите години криза, конечно се охрабруваат да експериментираат со облеката и со модата. Должината на малиот црн фустан исчезнува и тој за првпат станува навистина мал. Големо внимание се посветува и на деталите, а омилени стануваат отворите по должина на ногата. Мини сукњата на Мари Квант е револуционерното парче облека на 60-тите години и најверојатно причината за сè пократкиот црн фустан. Не смееме да ја заборавиме и Одри Хепберн во „Појадок кај Тифани“, модната икона на 60-тите и малиот црн фустан истовремено.
70-тите години
Време кое остави свој посебен белег во историјата на музиката, модата, размислувањата на младите, политиката и засекогаш ги промени шемите на однесување. Златните години на хипиците, диско кралиците и глам рок стилот се можеби најинспиративните години во историјата на модата, па и малиот црн фустан не ги избегна револуционерните промени. За разлика од 60-тите години кога особено се обрнувало внимание на материјалот, тука имаме многу повеќе избор, но и помал квалитет. Се заборава на строгите линии и елегантните материјали, па малиот црн фустан сега се комбинира со проѕирни парчиња и чипка. Особено позната варијација на фустанот е во панк-рок стил, со нерамномерни линии, сечење и надодавање различни материјали. Многу накит и мрежести хулахопки се неизбежните додатоци.
80-тите години
Овие години носат нови промени за малиот црн фустан. Се обрнува внимание на тенкиот струк и доста популарен е пеплум трендот, којшто ни се врати и овие неколку сезони. Рамената се многу пошироки и нагласени, а особено се ценат рачната изработка и везените детали на самите фустани.
90-тите години
Гранџ стилот на 90-тите го врати малиот црн фустан на неговите корени нагласувајќи ја едноставноста. Се комбинира со сандали или елегантни чизми. Материјалите се тенки и припиени, а должината е сè пократка. Тука мора да ги споменеме и девојките од „Спајс грлс“ кои се симбол на музиката и модата на овој период.
По 2000-та година
Во првите години на новиот век малиот црн фустан го доживеа и својот 80-ти роденден, уште еден мал потсетник на неговата безвременост и значење за модата. Иако овие години ги следи тренд на ексцентричност во креативното изразување, сепак едноставноста на малиот црн фустан сè уште владее со црвениот тепих. И до ден денес, обожуваме да го комбинираме во секоја можна варијанта и постојано се враќаме низ неговата историја за малку инспирација.
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
