Претходно
Филм: Педесет нијанси потемно (Fifty Shades Darker)
Кристијан се бори со своите внатрешни демони, а Ана мора да се соочи со лутината и завидливоста на една од претходните подредени на Кристијан
Режија: Џејмс Фоли
Улоги: Дакота Џонсон, Џејми Дорнан
Времетраење: 118 минути
Премиера: 9 февруари 2017
Јазик: англиски
Жанр: драма, романса
Наша оценка: 6/10
Ваша оценка: 
(35 гласа, просек: 7,43 од 10)
Loading...
Пристигна и второто продолжение на светскиот феномен познат како 50 нијанси сиво. Но, исто како и првиот, така и овој филм не успева добро да ја пренесе оригиналната приказна од книгите. Главните актери, Дакота Џонсон и Џејми Дорнан немаат ни трошка забележлива хемија меѓу нив, што е клучно за една ваква сторија да се пренесе на пошироката публика. Од друга страна пак, тие и како да не се трудат да ја одиграат својата улога како што треба и делуваат како само да се шетаат на сцената со цел да можат да си ја земат платата за денот. Дури и оние кои ги имаат читано книгите, не можат да се препуштат на текот на настаните, бидејќи самата приказна нема ни длабочина, ни природно развивање, па сè делува избрзано, натрупано и недоволно објаснето.
Да, овој пат имаме можност да навлеземе подлабоко во животот на Кристијан Греј (Џејми Дорнан) и да откриеме дел од клучните настани што предизвикале тој да е таков каков што е. Но, тоа не е ни приближно доволно за да може да се почувствува комплексноста на неговата личност, што и самиот неколкупати ја нагласува. Тој дури и признава дека е садист во обид да ја задржи Ана (Дакота Џонсон) крај себе, која пак во текот на целиот филм делува иритирачки неодлучно – во еден момент таа вели дека сака бавно да се движат, бидејќи се плаши од него, а веќе во следниот е гола и го предизвикува на секс. Ако треба да избереме една работа што е изведена беспрекорно, тоа е изборот на штиклите на Ана – нема сцена каде што таа носи лош модел. Сè останато има повеќе мани од позитивни страни.
